About Us

Duniya momin ke liye qaid khana aur kafir ke liye jannat he. Jis tarha qaid khane me insaan apni marzi se nahi jee sakta aur na wo khush reh sakta, usi tarha is duniya me hum bhi apni marzi se nahi jee sakte balke Qur’an Hadees ke mutabiq jeena hum pe farz he aur na hum is duniya me aesh o Ishrat se jeene ke liye bheje gaye. Is Duniya ki bas itni haisiyat he ke ye humare liye apni akhirat ke faisle ka ek zariya he ke hum me se kaun Jannat me jaayega, kaun jahannum me jaayega. Bas isse jyada ye duniya humare liye kuch nahi he. Ye haqeeqat kehne ke liye to sab ko pata he lekin fikr is baat ki hoti he ke sab ke amal me ye baate dekhaai nahi deti. Ye sab jaante hue bhi hum me se kai musalman bhai behne namazo se gaafil kyu hai ? soodkhoori me mubtala kyu hai ? Duniya ki kamyabi ke shauq me gair pardgi me mubtala kyu hai ? Najaayaz rishto me kyu hai ? Jaaydaado me ek dusro ka haqq kyu maar rahe hai ? Din raat mehnat karke sirf duniyawi aesh o Ishrat paana maqsad kyu ban gaya he ? Chugul khoori ko mamooli kyu samajh rahe hai? aur in sab se badh ke apne zaban se La ilaaha illallah kehte hue bhi Shirk me mubtala kyu hai ? Rasool (saw) se mohabbat ka dawa karte hue bhi sunnato se gafil aur bidato me mubtala kyu hai ? Bas isi ek fikar se maine 2020 me ek choti si shuruwaat kee thi apni deeni behno aur bacho ko Allah ke deen ki sahi pehchaan karwane ki. Alhamdulillah mere fikr ke mutabiq Allah ta’la ki madad bhi aati gai aur main aage badhte gai fir achanak April 2021 pata chale ke mujhe Blood Cancer he. Alhamdilillah ye cancer mere liye Allah ta’la ki itni badi nyamat saabit hui ke main lafzo me bataa nahi sakti. Koi mujhse puche ke Allah tala ki taraf se mili hui nyamato me aapke liye sab se badi nyamat kya he to wallahi main kahungi ke mujhe 2021 me Blood cancer ka aana. Kyunke is cancer ne mere Allah ke deen ki fikar aur amal ki fikar ko aur badha diya. Mujhe aur mujhse jude hue kai deeni behno ko ek bahut badi ibrat mili ke insaan ki zindagi kis tarha se ek lamhe me maut ka shakal ikhtiyaar kar le sakti he aur kya hoga agar hum ne akhirat ki tayyari na kee hui ho to ? aur fir 2021 se apne Blood Cancer ka ilaaj lete hue hi main apne maqsad ko badhaate gai aur Allah ta’la ki madad aate gai aur fir Aalimaat, faazilaat, hafizaat muallimaat mere saath idaare me judte gaye aur fir Allah ta’la ki ek bahut badi nyamat ke Shaikh Sifatullah Jamei aur Janab Mohammad Firdouse umri bhi meri fikr ki qadar karte hue meri rehnumani karte gaye aur aaj ye idaara ek mukammal madrase ki ek aisi shakal ikhtiyaar kar chuka jaha humara sirf ek hi maqsad he ke hum apne deeni behno aur bacho ko jin ke paas madraso ko jaane ki sahulat na ho, unko deen e islam ka sahi ilm de, Shirk bida’t se aagah kare, ek Allah ki taraf bulaaye, deen ka sahi aur pokhta ilm de aur sirf ilm nahi balke ye samjhaaye ke ilm amal ka naam he aur ilm amal ke liye seekha jaata he.

Kehne ke liye to bahut kuch he lekin mokhtasar sa is madrase ka maqsad aur fikar aapko samajhana maqsad tha. Is idaare me kya kya courses padhaye jaate hai, iske liye Course details me dekh sakte hai. Allah ta’la hume uske sahi deen ko jaanne aur uske mutabiq jeene ki tawfeeq ata farmaaye. Aameen